Nyheter
Rår om auka kvote på reker i Barentshavet
Havforskarane rår om at det maksimalt bør verte fiska 150 000 tonn reker i Barentshavet i 2025.
I 2025 rår havforskarane om ein kvote på maksimalt 150 000 tonn reke. Det er 7000 tonn høgare enn den tilrådde kvoten for 2024.
– Rekebestanden i Barentshavet held seg stabil på eit ganske høgt nivå, forklarar havforskar Fabian Zimmermann.
Det bilaterale kvoteråd er gjeve av den norsk-russiske fiskerikommisjonen. I dag er det ikkje nokon felles totalkvote på rekefisket i Barentshavet, og kvoterådet får difor avgrensa tyding.
Auka rekeinteresse etter kvotekutt
Det norske fiskeriet står framleis for mesteparten av rekefangsten i Barentshavet. I dei seinare åra har derimot fleire land meldt seg på:
– Vi ser at landingane både i Noreg, Russland og særleg EU har auka over dei siste åra, seier Zimmermann og held fram:
– Både interessa og rekefangstane har auka betydeleg etter at det har vore store kvotekutt på andre viktige bestandar.
Fangstar under råd
Fangstane plar likevel ligge godt under den tilrådde kvoten.
I 2024 var den tilrådde kvoten 143 000 tonn, medan den forventa fangsten i år er 83 000 tonn. Det er likevel eit byks opp frå totalfangsten året før: 73 000 tonn reke i 2023.
Den store forskjellen mellom kvoteråd og historiske fangstar er ei særskild utfordring i bestandsvurderinga:
– Vi veit ikkje heilt korleis bestanden toler ei betydeleg høgare beskatning, noko som aukar usikkerheita i kvoterådet. Det er difor viktig å følgje nøye med på korleis det høgare fangstnivået kjem til å påverke bestanden, seier havforskaren.
Källa: Havforskningsinstituttet